«Бекітемін»
«№7 Айгөлек бөбекжай балабақша» МКҚК
Меңгерушісі------------------- Конысова Н.А
Күз мерекесіне арналған
«Арайлы алтын күз»
атты тәрбие сағаты
Тәрбиеші: Салимбаева М.
Жилыбаева Ж.
«Балапан» кіші топ
Талғар қаласы, 2022
Тақырыбы: «Арайлы алтын күз»
Мақсаты: Күз мезгілінің өзгерістерін ұғындыру, мерекелік көңіл – күй орнату. Балаларды ән салуға, би билеуге деген ынталарын арттыру. Күз байлықтары: астық, көкөніс, жеміс-жидектер туралы білімдерін кеңейту. Алтын күздің адамға берер пайдасын түсіндіру және табиғатты сүюге тәрбиелеу.
Күтілетін нәтиже:
Біледі : күз мерекесіне дайындықпен келуді түсінеді.
Игереді: Би ,ән айтуды.
Меңгереді: сөйлеу дағдыларын қалыптастырады.
Зал мерекеге сай безендіріліп, әдемі ән ойнап тұрады. Бүлдіршіндер залға кіріп, орындықтарға жайғасады.
Балалардың қолдарына жапырақтар таратылады.
Жүргізуші: - Сәлеметсіңдер ме балалар! Ел байлығын арттырған, берекелі күз айы да келді.
Ендеше «Арайлы алтын күз!» атты ертеңгілігімізді бастаймыз:
Қызыл, сары, алтын, көк,
Алуан, алуан жапырақ.
Күзгі бақта күлімдеп,
Көз тартады жадырап.
Менің кішкентай бүлдіршіндерім, Алтын күз мерекеміз құтты болсын!
Әрбір қадамдарың күздей берекелі болсын, езулеріңнен тәтті күлкілерің кетпесін.
Бұлттар төгіп, жерге шөгіп,
Дымқыл тұман басады.
Шөп сарғайып, өңі тайып,
Дала сұры қашады.
Бой жаза алмай, ойнай алмай,
Денең мұздап тоңады.
Бөбектерім айтыңдаршы
Бұл қай кезде болады?
Балалар: - Күзде!
Жүргізуші: - Балалар бізге қонақ келіп тұр. Орнымыздан тұрып қарсы алайық.
(Балалар қол соғады, музыка ойналады, залға билеп күз ханшайымы кіреді)
Күз ханшайымы:
Уа, халайық, дарқан далам армысың!
Табиғатым жаны жайсаң тал мүсін.
Ханшайымы күздің бүгін келіп тұр,
Алмақ болып бар халқымның алғысын!
- Сәлеметсіңдер ме, сүйкімді балалар! Бүгін сендерде мереке болып жатыр екен, денсаулықтарың зор, дастарқандарыңыз жеміс-жидекке мол болсын. Мен мендердің ән мен билеріңді тамашалауға келдім!
Жүргізуші: - Күз ханшайымы, төрлетіңіз! Біздің ұл-қыздарымыздың өнерін тамашалаңыз.
Ән: «Топ-топ балақан!»
Жүргізуші: - Балалар бізге тағы қонақ келді. Орнымыздан тұрып қарсы алайық.
Қоян: - Сәлеметсіңдер ме балалалар! Не болып жатыр, неге шулап жатырсыңдар?
Жүргізуші: - Сәлеметсің бе қоян! Біз күз мерекесін тамашалауға жиналып жатырмыз. Ал өзің не істеп жүрсің?
Қоян: - Мен орманда жаңғақ теріп жүріп, бір де бір жеміс-жидек таппадым. Жеміс-жидек жинап, қыс мезгіліне азық дайындайын деп едім. Балалар маған көмектесесіңдер ма?
Балалар: - Иә, көмектесеміз!
Жүргізуші: - Балалар қоянға бақшадан теріп алған алма, алмұрттан берсек қалай қарайсыңдар?
Балалар: - Иә, келісеміз!
Қоян: - Рақмет балалар, өздерің мейірімді екенсіңдер. Енді қысқа азығым дайын! Мен орманыма қайтайын, қош сау болыңдар!
Би: «Жапырақтар»
Жүргізуші: - Күз ханшайымы енді балаларымыздың тақпақтарын қабыл алыңыз. Ортада : Ибраһим, Алдияр, Әмірхан!
Ибраһим:
Алтын, сары, қызыл, көк,
Алуан-алуан жапырақ.
Күзгі бақта күлімдеп,
Көз тартады жадырап. Алдияр:
Күздің қазан айында
Алма, алмұрт піседі.
Жапырақтар сарғайып,
Саудырап түседі. Әмірхан:
Күн суытып,
Жапырақтар түседі.
Астық – жеміс жиылады,
Қамбамызға құйылады.
Күз ханшайымы: - Керемет, өте өнерлі екен балалар!
Жүргізуші: - Балалар күзде ауа райы қандай болады?
Балалар: - Күн салқындап, жаңбыр жауады.
Жүргізуші: - Дұрыс. Ұл – қыздарымыз ортаға шығып, ән тамашалайық!
Оркестр : «Сылдырмақ»
Жүргізуші: - Рақмет балалар!
Күз ханшайымы: - Балалар енді менің басқа бала – бақшадағы балаларға баратын уақытым болыпты.
Мен кетейін, сау болыңдар! Келесі кездескенше аманшылық болсын!
Жүргізуші: - Балалар, Күз ханшайымына рақмет айтайық!
Балалар күз ханшайымымен қоштасады .
( музыка ойнап, Күз ханшайымы шығып кетеді )
Ән: «Кап-кап, тук-тук-тук!»
Жүргізуші: Бүгінгі «Арайлы алтын күз» - атты ертеңгілігімізді аяқтай отырып, күз берекелі де астықты болсын демекпіз.
Келесі кездескенше сау болыңыздар!